Сериозен инцидент се случи во хотел во Орнос на грчкиот остров Миконос, кога двајца млади бразилски државјани биле пронајдени без свест во приватен базен во соба на третиот кат. Еден од нив, на 23 години, бил извлечен жив и пренесен во Здравствениот центар на Миконос, додека вториот, на 25 години, бил прогласен за мртов на лице место.
Хигиеничарот прв забележал вода која течела од базенот на собата на балконот подолу и веднаш ја известил рецепцијата. Вработени веднаш влегле во собата и ги нашле двајцата млади во базенот без свест.
При увидот, властите пронашле употребен пластичен шприц на балконот, како и четири мали кесички со бел прашок од непознат состав, за кој се претпоставува дека е наркотична супстанца. Сите наоди се конфискувани и испратени на лабораториско испитување од страна на Поддирекцијата за безбедност на Миконос.
Надлежните власти наредија обдукција за да се утврди точната причина за смртта, а надлежен обвинител од Првостепениот суд во Сирос е информиран. Прелиминарната истрага продолжува со цел да се разјаснат сите околности околу трагичниот инцидент.
