Новогодишната и божиќната магија годинава посебно се почувствува низ скопските маала, каде домовите на граѓаните заблескаа со креативни светлосни украси и празничен дух. Во рамки на манифестацијата „Украсуваме по скопски“, беа прогласени најубаво украсените дворови, тераси и најинспиративниот ученички расказ, како признание за вложениот труд, имагинацијата и љубовта кон празниците.
Од Град Скопје порачуваат дека целта на настанот била да се мотивираат граѓаните активно да учествуваат во создавањето на празничната атмосфера, претворајќи ги своите домови во мали празнични приказни кои внесуваат топлина и радост во секое соседство. Според градските власти, токму ваквите иницијативи го зајакнуваат чувството на заедништво и го прават градот попривлечен и поискрено празничен.
За најубаво новогодишно украсен двор од индивидуална семејна куќа беше избрана Адријана Јовановиќ од населбата Маџари. Нејзиниот двор, лоциран на улицата Темко Попов, се издвоил со богата декорација, хармонија на светла и автентичен празничен амбиент. Победничката доби парична награда од 20.000 денари за креативноста и вложениот труд.
Во категоријата најубав расказ на тема „Новогодишни желби и празнувања“, наградата ја освои Христина Наумов, ученичка во СУГС „Ѓорѓи Димитров“. Нејзиниот текст ја пренесува детската радост и празничната надеж, инспирирајќи ги сите со искреноста и топлината на својата приказна. За ова, таа доби награда од 5.000 денари.
